IFFR i Fundashon Bon Intenshon ta organisá na 2012 un festival sinematográfiko nobo na Kòrsou

KOMUNIKADO PA PRENSA 8 di yüni 2011

IFFR i Fundashon Bon Intenshon ta organisá na 2012 un festival sinematográfiko nobo na Kòrsou.

International Film Festival Rotterdam (IFFR) i Fundashon Bon Intenshon a firma riba 7 di yüni un akuerdo di sosio i ta organisá na 2012 na Willemstad (Curaçao) un festival sinematográfiko ku durashon di kuater dia. Bou di nòmber ‘Curaçao International Film Festival Rotterdam’ (Curaçao IFFR) e promé edishon lo tuma lugá di djaweps 29 di mart te djadumingu 1° di aprel 2012. E lokalidat prinsipal di Curaçao IFFR lo bira The Cinemas, e kompleho nobo ku seis sala pa proyektá pelíkula den e parti di siudat Otrobanda di Willemstad.

Curaçao International Film Festival Rotterdam lo komplementá e oferta di pelíkula na Willemstad ku presentashon di pelíkulanan independiente i artístiko, ademas dokumental i pelíkula kòrtiku. E programa di e festival, ku asento riba pelíkula Karibense i Latino–Amerikano, ta enserá pelíkula di IFFR 2012 i obranan mas resien, un programa edukativo pa muchanan di skol i eventonan spesial entre otro un presentashon pa ‘drive-in’. Na tur lo proyektá un kantidat di 20 pelíkula. Meskos ku na Rotterdam na Willemstad kaminda ta posibel lo ta presente algun trahadó di pelíkula pa presentá nan obra i despues di presentashon nan lo kontestá pregunta di públiko.

Direktor Rutger Wolfson di IFFR: “Hopi komplasé nos ta pa organisá huntu ku Fundashon Bon Intenshon e IFFR Curaçao, un inisiativa espléndido ku lo oumentá e oferta kultural di Willemstad. E festival sinematográfiko lo ke ta un inspirashon pa bishitantenan di teater i tambe pa, trahadó di pelíkula hóben talentoso for di region. Pa IFFR esei ta nifiká un ekstenshon ku ta bonbiní pa e aktividatnan internashonal pa kua nos ta pidi atenshon pa e pelíkulanan ku e festival lo proyektá i ku e festival ta sostené aktivamente. Durante e di 41 edishon benidero di IFFR na Rotterdam nos ta mira padilanti komo un evento espesial e promé edishon di Curaçao IFFR. Seguidamente nos ta traha e programa di pelíkula i nos ta duna konseho tokante e produkshon di pelíkula na Willemstad. Kòrsou ya kaba tin un oferta sinematográfiko komersial ekselente. Huntu ku Fundashon, IFFR lo tin masha gana tambe pa kuminsá edifiká i yega na e índole di pelíkula mas artístiko, dirigí riba un públiko amante di e tipo di pelíkula akí na Kòrsou i den region”.

Gregory Elias, fundadó i presidente di direktiva di Fundashon Stichting Fundashon Bon Intenshon: “E inisiativa akí ta laga palèt di koló sigui duna koló na aktividatnan artístiko na Kòrsou. Nos ta spera ku e festival akí lo bira un evento ku lo bini bèk kada aña, ku kua Kòrsou finalmente lo por presentá su mes komo un lugá di enkuentro pa trahadónan i produktornan di pelíkula for di den region di Karibe i Latino Amérika. Mi ta gradesí e tantísimo personanan, ku den un tempu relativamente kòrtiku a kontribuí di manera kreativo i konstruktivo pa hasi e festival akí bira posibel. En espesial mi ta yama Eduardo de Veer danki, ku for di prinsipio a reakshoná di manera entusiasmá no solamente ku palabra, pero tambe ku hecho, poniendo The Cinemas desinteresadamente na disposishon pa tene e festival. E kontribushon akí a hasi posibel pa organisá un festival di e kaliber i embergadura akí huntu ku IFFR komo sosio. Nos ta spera ku e festival akí, tantu riba nos isla komo den eksterior lo atraé hopi bishitante nobo i bishitante interesá. Dirigiendo mi mes na IFFR lo mi ke bisa: “Rotterdam, we think this is the beginning of a beautiful friendship.”

Direktor komersial Janneke Staarink di IFFR: “E kooperashon entre IFFR i Fundashon Bon Intenshon no ta enserá solamente organisashon di Curaçao IFFR, pero nos ta orguyoso di por yama tambe Curaçao IFFR bonbiní komo di kuater patrosinador prinsipal banda di e sosionan eksistente Volkskrant, VPRO i UPC. IFFR i Fundashon Bon Intenshon tin e intenshon pa sera un kombenio di kooperashon pa mas aña.”

Fundashon Bon Intenshon, un fundashon establesí na Kòrsou a keda fundá na 1990. For di un envolvimentu sosial, e Fundashon ta sostené proyektonan riba tereno di enseñansa, kultura, deporte, kombatimentu di pobresa, kuido i turismo. E Fundashon for di temporada 2008–2009 ta patrosinador prinsipal di klup di futbòl di divishon di honor di Hulanda NEC, patrosinador prinsipal di klup di beisbòl Sparta-Feyenoord i ta ko – organisadó i úniko patrosinador di Curaçao North Sea Jazz Festival. E di dos edishon di e festival akí lo tuma lugá riba 2 i 3 di sèptèmber 2011.

International Film Festival Rotterdam, un di eventonan kultural di mas grandi di Hulanda, no ta solamente un ‘must’ pa fanátikonan di sine, pero tambe pa amantenan di kultura ku stima aventura. E festival ta skohe pa talento sinematográfiko hóben, pa outornan di pelíkula ku un signatura independiente inovativo i pa trahadó di pelíkula òf artistanan ku ta eksplorá i surpasá límitenan inovativo. E programa di pelíkula ta konsistí kompletamente di pelíkula ku no tabata proyektá ainda promé na Hulanda. E Fundashon Hubert Bals, ku ta yuda trahadónan di pelíkula di paisnan den desaroyo i Cinemart, e merkado ko-produktor mas grandi na mundu pa proyektonan sinematográfiko ku un presupuesto chikitu te mediano, ta forma parti di e aktividatnan di IFFR. Ademas IFFR tin un programa edukativo, un propio etikèt di dvd Tiger Releases i un kanal di YouTube. Na 2011 te festival a konosé 340.000 bishitante. E di 41 edishon di IFFR ta tuma lugá 25 di yanüari te 5 di febrüari 2012 na Rotterdam, kaminda IFFR lo pone e festival di Kòrsou ekstensamente bou di atenshon di e bishitantenan, lektornan, oyentenan i espektadornan di e diferente eksposishonnan den medionan di publisidat.

Websitenan:
IFFR Curacao: www.iffrcuracao.com (den desaroyo)
IFFR: www.filmfestivalrotterdam.com
Organisashon di biahe: Does Travel & Cadushi Tours: www.caribbean.nl

(Final komunikado pa prensa)

Press information IFFR:
IFFR Press Office, Bert-Jan Zoet, [email protected], +31 10 8909090